Thewis Hobma fan Harns hat sneon it fierljeppen yn Grypstsjerk wûn. Mei in ôfstân fan 19.25 meter ljepte er krekt fierder as Sytse Bokma fan Hylpen (19.22 meter). Nard Brandsma fan Warkum einige as tredde mei in ôfstân fan 19.02 meter. Brandsma wie oer it hele seizoen wol de sterkste ljepper yn it klassemint en wûn krekt as ferline jier sadwaande de fryske leiderstrui.

De fierste sprong kaam fan junior Freark Kramer mei 19.78 meter. Dêrmei is Kramer miskien wol de grutte outsider foar de Sulveren Pols op it FK yn Winsum. De lêste junior dy’t dat slagge is Hannes Scherjon yn 2006.

Ek by de froulju wiene de ferskillen lyts. Sigrid Bokma fan Hylpen wûn dêr, mei 14.01 meter. Anneke Broersma waard twadde mei 13.98 meter, folge troch Akke Dijkstra mei 13.90 meter. Bokma wûn ek it klassemint by de froulju.

By de junioaren wûn Freark Kramer mei in moaie sprong fan 19.78 meter. Dêrmei wûn Kramer mei oermacht ek it junioare-klassemint. Wietse Nauta (18.12) en Jan Teade Nauta (17.75) kompletearren it poadium by de junioaren.

Wisse Broekstra wûn by de jonges mei 16.30 meter; Bente Vlas by de famkes mei 13.31 meter. Beide waarden yn har klasse ek klassemintswinners.